रयत शिक्षण संस्थेत 817 जागांची शिक्षक भरती; मुलाखतीशिवाय होणार निवड

Rayat Shikshan Sanstha Satara Shikshak Bharti 2026: सातारा येथील रयत शिक्षण संस्थेने शिक्षक पदांसाठी मोठी भरती जाहीर केली आहे. पवित्र पोर्टलच्या पहिल्या टप्प्यात प्रसिद्ध करण्यात आलेल्या जाहिरातीद्वारे प्राथमिक, माध्यमिक आणि उच्च माध्यमिक विभागातील विविध शिक्षक पदांसाठी उमेदवारांना संधी मिळणार आहे. ही भरती शिक्षक अभियोग्यता व बुद्धिमत्ता चाचणी म्हणजेच टीएआयटी २०२५च्या आधारे करण्यात येत असून, विशेष म्हणजे या भरतीमध्ये मुलाखतीशिवाय उमेदवारांची निवड केली जाणार आहे.

या भरतीमध्ये प्राथमिक विभागासाठी एकूण ११ पदे उपलब्ध आहेत. तर माध्यमिक आणि उच्च माध्यमिक विभागासाठी तब्बल ८०६ पदे उपलब्ध करून देण्यात आली आहेत. त्यामुळे शिक्षक पदासाठी तयारी करणाऱ्या उमेदवारांसाठी ही एक महत्त्वाची संधी मानली जात आहे.

प्राथमिक विभागातील पदे

रयत शिक्षण संस्थेच्या प्राथमिक विभागात एकूण ११ शिक्षक पदे आहेत. यामध्ये इयत्ता १ली ते ४ थी/५ वीच्या विद्यार्थ्यांसाठी पदवीपूर्व शिक्षकाची ९ पदे असून, या पदासाठी एकत्रित मानधन १६ हजार रुपये प्रतिमहिना देण्यात येणार आहे.

याशिवाय इयत्ता ६ वी ते ८ वीच्या विज्ञान विषयासाठी पदवीधर शिक्षकाची २ पदे उपलब्ध आहेत. या पदासाठीही १६ हजार रुपये प्रतिमहिना एकत्रित मानधन देण्यात येणार आहे.

माध्यमिक व उच्च माध्यमिक विभागातील पदे

माध्यमिक आणि उच्च माध्यमिक विभागासाठी एकूण ८०६ शिक्षक पदांची भरती केली जाणार आहे. यामध्ये विविध विषयांनुसार पदांचे वाटप करण्यात आले आहे.

पद	उपलब्ध जागा
पदवीपूर्व शिक्षक, इयत्ता १ली ते ४ थी/५ वी	१५०
पदवीधर शिक्षक, भाषा विषय	८६
पदवीधर शिक्षक, गणित व विज्ञान	६८
पदवीधर शिक्षक, सामाजिक शास्त्र	२७
विशेष शिक्षक, कार्यानुभव शिक्षण	१८९
शारीरिक शिक्षण शिक्षक, इयत्ता ९ वी ते १० वी	२८६
एकूण	८०६

भाषा विषयातील पदांमध्ये मराठी, इंग्रजी आणि हिंदी या विषयांचा समावेश आहे. तसेच शारीरिक शिक्षण शिक्षक पदासाठी एकत्रित मानधन १८ हजार रुपये प्रतिमहिना देण्यात येणार आहे.

विविध प्रवर्गांसाठी आरक्षण

या भरतीमध्ये शासनाच्या नियमानुसार विविध सामाजिक प्रवर्गांसाठी आरक्षणाची तरतूद करण्यात आली आहे. प्राथमिक विभागात खुल्या प्रवर्गासाठी ४, अनुसूचित जाती प्रवर्गासाठी १, आर्थिकदृष्ट्या दुर्बल घटकांसाठी २, सामाजिक व शैक्षणिकदृष्ट्या मागास प्रवर्गासाठी २ आणि इतर मागासवर्गीय प्रवर्गासाठी २ पदे नमूद करण्यात आली आहेत.

माध्यमिक विभागात खुल्या प्रवर्गासाठी २८४, अनुसूचित जाती प्रवर्गासाठी १७२, आर्थिकदृष्ट्या दुर्बल घटकांसाठी १०५, सामाजिक व शैक्षणिकदृष्ट्या मागास प्रवर्गासाठी ८२ आणि इतर मागासवर्गीय प्रवर्गासाठी ७८ पदांचे वाटप करण्यात आले आहे. याशिवाय विमुक्त जाती, भटक्या जमाती तसेच इतर आरक्षित प्रवर्गांसाठीही नियमानुसार पदांचे वाटप करण्यात आले आहे.

या भरतीमध्ये महिलांसाठी, माजी सैनिक, अंशकालीन कर्मचारी, प्रकल्पग्रस्त, भूकंपग्रस्त, खेळाडू, दिव्यांग आणि अनाथ उमेदवारांसाठी समांतर आरक्षणाची तरतूद लागू आहे.

टीएआयटी २०२५ देणे आवश्यक

या भरतीसाठी सर्व उमेदवारांना टीएआयटी २०२५ परीक्षा दिलेली असणे आवश्यक आहे. तसेच उमेदवारांनी पवित्र पोर्टलवर स्व-प्रमाणीकरण आणि नोंदणीची प्रक्रिया पूर्ण केलेली असणे गरजेचे आहे. संबंधित पात्र उमेदवारांनाच ऑनलाइन अर्ज करण्याची संधी मिळणार आहे.

टीईटी किंवा सीटीईटीची पात्रता

इयत्ता १ली ते ५ वीच्या शिक्षक पदासाठी टीईटी पेपर १ किंवा सीटीईटी पेपर १ उत्तीर्ण असणे आवश्यक आहे. ही पात्रता टीएआयटी २०२५पूर्वी प्राप्त केलेली असावी.

इयत्ता ६ वी ते ८ वीच्या गणित व विज्ञान विषयाच्या शिक्षक पदासाठी टीईटी किंवा सीटीईटी पेपर २ मधील गणित व विज्ञान विषयाची पात्रता आवश्यक आहे. सामाजिक शास्त्राच्या शिक्षक पदासाठी पेपर २ मधील सामाजिक शास्त्र विषयाची पात्रता आवश्यक आहे.

भाषा विषयाच्या शिक्षक पदासाठीही टीईटी किंवा सीटीईटी पेपर २ची आवश्यक पात्रता असणे गरजेचे आहे.

जिल्हा बदलीबाबत महत्त्वाची अट

२१ जून २०२३ रोजीच्या शासन निर्णयानुसार जिल्हा परिषद किंवा अनुदानित संस्थांमध्ये नव्याने नियुक्त होणाऱ्या शिक्षकांना जिल्हा बदलीचा हक्क राहणार नाही. त्यामुळे उमेदवारांनी अर्ज करण्यापूर्वी या अटीची माहिती करून घेणे महत्त्वाचे आहे.

एसईबीसी आरक्षणाबाबत महत्त्वाची सूचना

एसईबीसी प्रवर्गासाठी नमूद करण्यात आलेले आरक्षण हे मुंबई उच्च न्यायालयातील सुरू असलेल्या याचिकांच्या निर्णयाच्या अधीन राहणार आहे. त्यामुळे या प्रवर्गातील उमेदवारांनी अधिकृत जाहिरात आणि पवित्र पोर्टलवरील अद्ययावत सूचनांकडे लक्ष देणे आवश्यक आहे.

PDF जाहिरात: https://rayatshikshan.edu/notices

ऑनलाइन अर्ज: https://tait2025.mahateacherrecruitment.org.in/Public/Home.aspx